|
Is-Surmast Muscat
Azzopardi twieled f’Ħal Qormi nhar it-23 t’Awwissu, 1903
u hu iben Wenzu Muscat Azzopardi u Emilja mwielda Sammut.
Fi tfulitu ħakmitu marda li żammitu ġewwa għal erba’
snin, tant li keinet ukoll wasslitu f’xifer il-mewt.
Intant, ta’ ħdax-il sena huwa kien diġa’ beda jitħarreġ
fil-mużika fl-Istitut ta’ San Ġużepp tal-Ħamrun, taħt
is-surmast Abela Scolaro.
Ta’ għoxrin sena s-surmast
Muscat Azzopardi laħaq surmast direttur tal-banda ta’ l-Istitut
ta’ San Ġużepp tal-Ħamrun. Fis-sena 1928, wara li ngħata
bidu għat-twaqqif tal-banda San Ġużepp fi ħdan l-istitut
ta’ San Ġuzepp f’Għajnsielem, is-surmast Anton Muscat
Azzopardi, avviċinat minn Mons Ġużeppi De Piro, aċċetta
sabiex jgħallem il-mużika lit-tfal ta’ l-Orfanatrofju
f’Għawdex.
Barra li kien għalliem
tal-mużika kien ukoll għalliem tal-vuċi. |
 |
Huwa għallem fl-iskola ta’ l-Imdina fik ukoll
fil-Liċeo. Muscat Azzopardi, barra li kien ukoll surmast
direttur ta’ diversi baned oħra Maltin, fosthom, il-banda Stella
Maris ta’ tas-Sliema, li tagħha wkoll dan surmast direttur minn
Marzu tas-sena 1938 sa’ l-1944. Kien ukoll surmast direttur
tal-baned Queen’s Own ta’ l-Isla bejn l-1937 u l-1967, u l-banda
San Ġorġ ta’ Ħal Qormi bejn l-1950 u l-1963, waqt li l-aktar
żewġ baned li dam surmast direttur tagħhom kienu l-baned L’Isle
Adam tar-Rabat (mill-1940 sa 1945 u mill-1950 sa l-1978), waqt
li mal-banda Sant’ Indrija ta’ Ħal Luqa dam mill-1932 sa’
l-1978. Hu kellu sehem kbir fit-twaqqif tal-banda Mount Carmel.
Dan is-surmast ikkompona wkoll diversi biċċiet mużikali li
jinkludu mużika sagra, innijiet, marċi funebri, u brijurżi kif
ukoll tipi oħra ta’ mużika, bħal: preghieri u barkaroli.
Hu miet nhar it-8 ta’ Diċembru, 1979 fil-kunvent tal-Patrijiet
Franġiskani ta’ Sant’Antnin f’Għajnsielem, Għawdex. Il-funeral
tiegħu sar l-għada u fil-korteo tiegħu għall-knisja ta’ Ġieżu
fir-Rabat, Malta. Ħadu sehem il-baned L’isle Adam tar-Rabat u
Sant’Indrija ta’ Ħal Luqa.
.
|
