|
Is-Surmast Ġużeppi
Farrugia twieled il-Belt Victoria, Għawdex, nhar is-16
ta’ Lulju, 1936, bin is-surmast Mikiel u Marija imwielda
Vella. Ta’ seba’ snin beda jitħarreġ fl-arti mużikali
taħt idejn missieru li kien surmast direttur ta-baned
Victory tax-Xagħra u San Ġużepp t’Għajnsielem.
Fil-vjolin tħarreġ taħt idejn zijuh, il-mejjet surmast
Ġanni Vella. Ta’ għaxar snin is-surmast beda jdoqq it-tamborlin
mal-banda ‘Victory’ tax-Xagħra, iżda aktar tard ingħaqad
bħala bandist mal-banda Leone. Fis-sena 1966, is-surmast
Ġużeppi Farrugia ġie avviċinat biex jagħmel
rinnovazzjoni tal-banda ‘San Ġużepp’ ta’ Għajnsielem.
|
 |
Mro. Ġużeppi Farrugia kien
għadu surmast direttur ta’ din il-banda sa meta miet fl-1992.
Banda oħra Għawdxija li s-surmast Farrugia kien surmast tagħha
hi l-banda ‘Prekursur tax-Xewkija. Nistgħu ngħidu li kellu jkun
is-surmast Farrugia li ntroduċa l-operetta fir-raħal tax-Xewkija.
Is-surmast Farrugia kien ukoll Maestro di Cappella ta’ diversi
knejjes u għalhekk kien jieħu sehem bil-mużika tiegħu f’diversi
festi f’Għawdex.
Is-Surmast Ġużeppi Farrugia kien ukoll kompożitur. Bosta huma l-kompożizzjonijiet
mużikali tiegħu li jinstabu fl-arkivji f’Għawdex. Huwa kkompona
marċi kemm brijużi kif ukoll funebri. Ikkompona wkoll diversi
innijiet fosthom, l-Innu tal-Banda San Ġużepp ta’ Għajnsielem,
l-innu marċ ‘Lil San Ġwann Battista u oħrajn. Ikkompona wkoll
Quddiesa li keinet ġiet esegwita fil-festi ċentenarji li saru
fil-Paroċċa tal-Fontana fl-1975. Is-surmast Farrugia barra li
kien impjegat mal-Gvern, kien ukoll dilettant ta’ l-iskultura u
d-disinn u flimkien ma ħutu ħadem il-bradella tal-Madonna ta’
Loreto ta’ Għajnsielem.
Is-surmast Farrugia żżewweġ lil Ġiġa mwielda Hili fl-1967 u
kellu tliet ulied. Fl-1984 tilef lil martu meta kellha 44 sena u
fil-funeral tagħha għall-Katidral ta’ Għawdex, ħadu sehem l-baned
‘San Ġużepp’ ta’ Għajnsielem u ‘Prekursur’ tax-Xewkija. Huwa
miet nhar it-3 ta’ Lulju 1992 u fil-funeral tiegħu tawh l-aħħar
tislima għadd kbir ta’ nies minn Għawdex kollu u ta’ kull
kategorija. Fis-sena 1996, il-Banda ‘San Ġużepp’ t’Għajnsielem
kixfet bust tas-surmast Ġużeppi Farrugia fil-każin tagħha.
|
