|
Wieħed mid-diretturi
li mexxew il-banda ‘San Ġużepp’ kien is-surmast Joseph
Nazzarenu Sammut. Imwieled il-Mellieħa nhar it-18 ta’
Ġunju 1941, ħa l-edukazzjoni tiegħu fl-iskola primarja
tal-Gvern u wara kompli fil-kullegg ta’ De La Salle
fil-Kottonera. Ta’ eta’ żgħira beda jitħarreġ fil-mużika
mal-Għaqda Mużikali ‘La Vittoria’ tal-Mellieħa. Huwa
kompla jitħarreġ fl-arti tal-mużika taħt diversi
surmastrijiet fosthom; Mro V. Ciappara, Mro W. Worley,
Mro Carmelo Pace u oħrajn. Bħala bandist Mro Sammut dam
idoqq mal-banda ‘La Vittoria’ għal aktar minn 35 sena u
għal bosta snin daqq ukoll mal-banda Naz. ‘La Valette’
tal-Belt Valletta. Wara t-twaqqif tal-banda tat-Tarzna
f’nofs is-snin ħamsin tas-seklu l-ieħor, Mro Sammut
insibuh mhux biss bħala bandist tagħha imma wkoll okkupa
karigi kemm ta’ assistent surmast kemm dik ta’ surmast
direttur. |
 |
Fil-1979 il-banda ‘La Vittoria’
ħatritu bħala assistent surmast u fdatlu f’idejn it-tagħlim
tal-mużika ta’ l-aljievi. Fil-bidu tas-snin tmenin, il-kumitat
tal-banda ‘San Ġużepp’ t’Għajnsielem fdalu f’idejh it-tagħlim
tal-mużika ta’ l-aljievi. Iżda wara l-mewt tas-surmast Ġużeppi
Farrugia fl-1992, Mro J N Sammut inħatar surmast direttur
tal-banda ‘San Ġuzepp’, kariga li dam jokkupa sa Frar 2003.
Għaqda Mużikali oħra li tagħha Mro J N Sammut kien surmast hi l-banda
‘Maria Regina’ tal-Marsa li tagħha dam surmast mill-1986 sa’
l-2001.
Bħala kompożitur Mro. J N Sammut għandu għadd ta’ marċi brijużi
u funebri, marċi sinfoniċi, overtures, fantasiji, innijiet,
mużika sagra u oħrajn. Fosthom insibu l-innu marċ Forza
Għajnsielem, il-marċ Lis-Segretarju u l-marċ funebru Wied ta’
Fjuri Vjola, l-intermezz Autunno, u diversi innijiet oħrajn.
Fost l-arranġamenti mużikali nsibu Danza Ungherese No5 ta’
Johann Brams, Largetto – Caro Mio Ben ta’ Giordani għal-sopran,
l-Ave Maria ta’ Gounod u oħrajn.
Mro. Sammut dam jaħdem it-Tarzna għal aktar minn 45 sena, iżda
llum hu rtirat. Madankollu xorta għadu jgħallem il-mużika u l-istrumenti
waqt li għadu jirranġa u jikteb il-mużika. Mro. Sammut hu
miżżewwġ lil Carmen Bartolo u għandu tlett ulied.
|
